පිරිමි භාරකරුවකු නොමැතිව හෝ පිරිමි භාරකරුවකුගේ අවසරයකින් තොරව හෝ විදෙස් සංචාරවල නියැලීමට සෞදි කතුන්ට, සෞදි රජයෙන් අවසර හිමිවී තිබෙනවා.
ඒ අනුව, වයස අවුරුදු 21 ට වැඩි කාන්තාවන්ට, ඇගේ පිරිමි භාරකරුගේ අවසරයක් ඇතිව හෝ නැතිව ගුවන් බලපත්‍රය සඳහා ඉල්ලුම් කළ හැකි වනවා. සෞදි රජ පවුල මේ බව නිවේදනය කළේ රාජ ආඥාවකිනි.
මේ වනතුරු සෞදි කාන්තාවකට ඇගේ සැමියා, පියා හෝ භාරකරුවාගේ අවසරය නොමැතිව ගුවන් ගමන් බලපත්‍රයක් ලබා ගැනීමට නොහැකි වූවා පමණක් නොව, සැමියා හෝ භාරකරු හෝ නොමැතිව විදෙස් සංචාර තහනම් වී තිබුණි.
ඊට අමතරව, සෞදි කාන්තාවන්ට දරු ප්‍රසූතියකදී, විවාහ මංගල උත්සවයකදී සහ දික්කසාදයකදී ඒ බව ලියාපදිංචි කිරීමේ බලය ද කාන්තාවන්ට ලබාදෙන බව රජ පවුල නිකුත් කළ රාජ ආඥාවේ වැඩිදුරටත් සඳහන් වෙයි.
සෞදි පිරිමින්ට සේම එරට කන්තාවන්ට ද සම අයිතිය ලබා දීමේ අරමුණ ඇතිව සෞදි රජය මීට පෙර ද මේ අයුරින් ප්‍රතිසංස්කරණ රැසක් හඳුන්වා දී ක්‍රියාවට නංවා ඇත. සෞදි කාන්තාවන්ට රිය පැදවීමට අවස්ථාවක් උදා වූයේ ද ඒ අනුවය. සෞදියේ නව ප්‍රතිසංස්කරණ හඳුන්වාදීම සිදුවන්නේ ඔටුන්න හිමි සෞදි කුමරු මොහොමද් බින් සල්මාන්ගේ උපදෙස් පරිදිය.
සෞදි මාධ්‍යවේදී ජමාල් කශොග්ජී ඝාතනයට අනුබල දුන්නැයි චෝදනා ලැබ සිටින සෞදි කුමරු 2030 දී සෞදියේ මහා ආර්ථික පෙරැළියක් කිරීමට සූදානමින් සිටී. ඒ සඳහා කාන්තා දායකත්වය සියයට 33 කින් ඉහළ නංවාලීමට ද කුමරු අපේක්ෂා කරයි.
-lankadeepa
https://bit.ly/2LTCipL
Discussion about this post